بیر بایاتی

بیر بایاتی 

عزیزلریمه ایتحاف؛

داماریمدا قانیمسان

جان ائوینده جانیمسان

بیرگون ایمانه گلسم

دینیم سن ایمانیمسان.

دلداربناب

تلگرامدا ائلیمیز - دیلیمیز آدیندا کانالیمین لینکی؛

                                                                             eldilimiz@

اؤزومه یازیقیم گلدی

نفس وورا وورا داغ باش یوخاری گئدیردیم.

اؤز عالمیمده سئیر ائدیردیم.

بیردن بیرهنیرتی ائشیتدیم، دؤنوب باخدیم. دالیمجا بیر کؤپک  گلیردی.

قارا بیر کؤپک. گؤزل. دوزلو. تب تمیز.

باخیشلاریندا محببت دالغالانیردی.

چانتامدان بیر تیکه چؤرک چیخاردیب قاباغینا آتدیم.

قویروغونو بولاییب باشلادی چؤرگی یئمه یه.

هارا گئتدیم دالیمجا گلدی.

اؤز اؤزومه دئدیم بورا باخ سن آللاه!

بو کؤپک بیر تیکه چؤرگین قدرینی بیر بئله بیلیر. نه دوز بیلن بیر حیواندی بو.

ائله کاش آداملاردا بیر بئله دوز بیلن اولایدیلار.

بیر نئچه ساعات داغ چیخدیم.

دره اندیم.

آمما کؤپک مندن ال چکمیردی.

داغین اتگینده ماشینیمین یانینا یئتیرنده ائله بیل کی آنلادی آیریلیق زامانیدی.

ساغ سولوما کئچدی.

باشماقلاریمی اییله دی.

قاباغیمی کسدی کی مندن آیریلماسین.

منی بیردن بیره بیر قهر باسدی.

آی داد و بیداد.

آی داد و بیداد.

آی آداملار اؤیره نین.

هئچ اولمایا بیر کؤپک قدر محببتیز اولسون. آی مخلوقاتین اشرفلری!

بو حالدا بیر بایاتی جوشدی اوره گیمده؛

مندن اؤترو اسن یوخ

دؤزن یوخ تلسن یوخ

یولا دوشوب گئدنده

قاباغیمی کسن یوخ!

                 اؤزومه یازیقیم گلدی ...

ساتیریک یازینین آردی!

سلاملار

آی قارداشلار قاباقچی یازی دا بیر بایاتی گلدی نیطقیما یازدیم ائله بیل بازاری برک توتوبدی تامام تویلاردا اوخوجولار اونو اوخویورلار!!!

ائله دؤرد بئش اؤلکه دنده زنگ آچدیلار کی کیشی سنده بو باشارات وار بس ناواختدان هاردایدین؟!

ائله گل بیزه طرف سنه ده یاخشی اولار بیزلره ده!!!

داها بیلمه دیم بیزلر هانسی بیزلردیلر!

چووالدوزا بنزر بیزلردیلر یا او بیری بیزلردیلر.

یاواش یاواش گئدمک فیکرینه دوشدوم کی بیر زامان باخدیم گؤردوم ای داد بیداد ائو آدامی منیم ایشیمی آنلاییب باشپورتیمی گؤتوروب گیزله دیبدی!!!

ایکی الیم اولدو بیر باشیم!

قورخوداندا بیر سؤز دئیه بیلمه دیم!!!

ایندی قالمیشام نه ائله ییم.

بیر دفه ایسته دیم فرار مغزها ائله یم اودا دوشدو آی ایشیغینا!

گئجه گوندوز فیکره قالمیشام کی اشی به من باشیما نه داش سالیم؟!

بیر طرفدنده ایسته ینلریم هئی منه دئییلر یئنی ماهنی یاز.

قالمیشام آرادا.

تانری هئچ کیمی منیم گونومه سالماسین.

نئچه گئجه قاباق ایلان ووران یاتدی من یاتانمادیم بیردن بیره بیر بئله بایاتی گلدی نیطقیما؛

دیل باغلی دوداق باغلی

گؤز باغلی قولاق باغلی 

ایستیرم قویام قاچام

یول باغلی یولاق باغلی...

هله ایندیلیک بونو اوخویون گؤرک باشیمیزا نه گلیر؟!

ساتیریک بیر یازی ( کئفلی ایسکندر، دوکتور جئری، ائلچی بئی ساغلیقلارینا)

یولداشلار هامیسی گیلئی ائله ییرلر کی داها تنبللشمیسن!

وئبلاگا بیر زاد یازیب قویماییرسان.

ماحمیدین زامانیندا بوندان چالیشقانیدین!!!

دئییرم: جانیم چالیشدیق چالیشدیق ماحمید گئتدی حسن گلدی.

خالقیندان اؤترو سؤیود کیمی اسن گلدی!

برجام اولدو فرجام اولدو.

شله پیرتلادی!

گونده بیر نوجومو فیش اوزه چیخدی!

امیر بازارینی یاندیردیلار کی بیر عیدده یه بیر ایپک دستمال یئتیشسین!

آخی من نه یازیم داها؟!

بوتون ایشلر دوزه لیب.

بئکارلیق بیتیب.

باهالیق ایتیب.

شیش یاتیب. (تورم ماهار اولوب)

قورد قویونولا دولانیر.

هئچ کیمین اوره گینده سو ترپشمیر.

دوکتور جئری مطببینی باغلاییب ساخت و پاخت (کیریخدیم بساز بفروش) ایشینیه گیریب.

کئفلی ایسکندر ایلده دؤرد دفعه مککه یه گئدیر.

اؤرت باسدیر ماحالینین کدخوداسی ائلچی بئی کانادادا کئفه کؤتک چکیر.

داها کم کسیر یوخدو کی.

دئدیلر: ایندی کی کئف دیزدندی اوندا بس بیر غزلدن زاددان یاز چؤله گئدنده اوخویاق قانیمیز دورولسون!!!

بیردن بیره نیطقیما بیر بئله بایاتی گلدی؛

نه آستار بللی نه اوز

نه ایری بللی نه دوز 

کیم کیمه دی باس گئدسین

نه اللی بللی نه یوز.

گئدین هله بونو اوخویون گؤروم دالیسی نه گلیر...

بیر نئچه یئنی دئییلمیش بایاتی

بوتون ائلیمیزی - دیلیمیزی سئون یولداشلارا ایتحاف.

عزیزیم آرا بیرگون

گؤر منی آرابیرگون

نیسگیل باغریمی یارار

پوزولسا آرا بیرگون.

     *****

عزیزیم گؤزده یئرین

اورکده گؤزده یئرین

گؤز آلتی بیرده باخسان

سالارام گؤزده یئرین.

     *****

سرین بولاق گور بولاق

گئدمه دایان دور بولاق

سنده کیملر یووونوب؟

اولوبسان بولور بولاق.

     *****

آغ بولاق قارا بولاق

گئدیرسن هارا بولاق؟

یولون سال بیزیم ائله

سلام وئر یارا بولاق.

     *****

گونو گونه جالادیق 

غم اوسته غم قالادیق

دونیانین چاناغیندان

 یالنیز زهر یالادیق.

     *****

داغ آشدیم دوزه دوشدوم

اللی دن یوزه دوشدوم

بیر جوت شاماما گؤردوم

درمه دیم اوزه دوشدوم.