اندیشه

فرهنگی، ادبی، تاریخی، هنری، طنز

اندیشه

فرهنگی، ادبی، تاریخی، هنری، طنز

اندیشه

درباره مدیر:
میر حسین دلدار بناب
متولد 1346 بناب مرند
پژوهشگر

بایگانی
آخرین نظرات
پیوندها

۱ مطلب در تیر ۱۳۹۹ ثبت شده است

۱۸
تیر

✍ چاییم ماسانین اوستونده بوزلامیشدی!

پاییزین پوزغون گونلرینین بیرینده، ائودن چیخیب دلی آداملار کیمی باش آلیب گئتدیم.
بیر زامان اؤزومه گلدیم گؤردوم کی، داغ یولونو قاتمیشام قاباغیما گئدیرم!
یاز اولسایدی یئنه بیر سؤزودو آمما پاییزین قیسسا گونلرینده داغدا نه واریدی، اؤزومده بیلمیردیم!
گون اییلیردی آمما من گئری قاییتمادیم. هر نه اولاجاق اولسون دئیه یولوما دوام وئردیم.
قو ووروردون قولاق باتیردی. انس دن _ جین دن خبر یوخودو. سایخاشلیق آدامی قورخویا سالیردی.
هردن بیر خیشیلتی گلیردی قولاغیما، بیلمیردیم ایلان_ چایان سسی دی یا قوروموش اوتلارین سسی!
هردن اؤز ایچیمه جوموب اوشاق ایکن بو یوللاردان نه قدر گلیب_ گئتدیییمی، کیملری گؤردویومو، گؤردوکلریمدن کیملری ایتیردیییمی دوشونوردوم.
گئت ها گئت، گئت ها گئت، یئتیشدیم گدیک آیاغینا. باشلادیم داغ باش _ یوخاری قالخماغا. بیر آز گئدندن سونرا اوره ییم تؤوشه دی. یاواشیدیم. نفسیمی دردیم. نه ایسه، یورغون_آرغین گدیگین باشینا چاتدیم. اوزاقدا بیر قارالتی لار گؤردوم. آرخاجدا قویون اوتلاییردی. کور چشمه نین قیراغیندا ایکی دانا چوبان چای قویوردولار. چوبان ایتلری منیم هنیرتیمی ائشیتجک آیاغا دوردولار.
چوبانلار ایتلرینین دورماغیندان دیکسیندیلر. اویان _ بویانا باخیب منی گؤردولر. ایتلر هورمه یه باشلادیلار. چوبانلار ایتلری ساخلاشدیردیلار. یئتیردیم چشمه باشینا. چوبانلارین بیری منی گؤرجک، تانیدی. گؤزلرینده بیر سئوینج یاراندی. یولداشی منه هویوقموش باخیردی. سیفی عمی منی یولداشینا تانیتدیردی. _ حاج میرمهدی آغانین اوغلو میرحسین آغادی، دئدی.
کئف _ احواللاشدیق. سیفی عمی سئوینجک مندن سوروشدو: _ آغا میرحسین آ، سن هارا بورا هارا؟ یول آزمیسان می؟ پاییز گونو داغدا نه ایشین وار؟ اؤزوده آخشام چاغی، الی یالین، چای سیز _ چؤرک سیز!
گولومسه ییب، گلمیشم گؤرم سیزلر نه کئفه باخیرسیز دئدیم.
سیفی عمی منه قئیقاجی باخیب، آللاه بو کئفی کسسین دئدی!
سیفی عمی نین یولداشی بیز دانیشا_ دانیشا اوجاق قیراغیندا اولان قومقومادان بیر چای سوزوب قاباغیما قویدو. بیر زادلاری اولمادان اوتانا_ اوتانا اوزومه باخیب بیردن آج اولارسان دئدی.
یوخ آجلیغیم یوخدو، دئدیم.
چایی خورتو _ خورتو ایچیب، سیفی عمی نی دانیشدیرماغا باشلادیم.
سؤز اوردان _ بوردان چکیلدی گئتدی قدیم چاغلارا. سیفی عمی چشمه نین قیراغیندا اولان قوجامان سویود آغاجینی گؤسترر کن، باشلادی بیر قدیم خاطیره دئمه یه.
_ لاپ گنج چاغلاریندا یئنی _ یئتمه بیر جاوانی ایدیم کی باشلادیم چوبانلیغا. یازین قیرخ بئشیندن اویانا قویونو چیخارداردیق داغا، داها یای دان بیر آی گئدینجه کؤیشه نه قاییتمازدیق. آرادا _ سیرادا کنده گئدیب حامام ائله ییب، پالتار دگیشردیک. آداخلیسی اولان دا گیزلینده بیر آداخلی بازلیق ائله ییب قاییداردی قویونون یانینا.
نه ایسه، ائله او ایللرین بیری، یای دان بیر آی گئدن سورونو داغدان کؤچوتدوک کؤیشه نه. او زامان بیر قوردباسار آلاش ایتیم وار ایدی. ایت دئمه آسلان دئ! قافلان دئ! یئلدن یئیین! اود پارچاسی. آیی دان گوجلو! آییق _ ساییق.
اون دانا قوچا _ قویونا دییشمزدیم. آلاشیمین قورخوسوندان بیر جاناوار سورونون هنده ورینه دولانا بیلمزدی. گئجه لر گؤزونو یوممادان سورونون دوره سینه دولاناردی.
نه ایسه، جانیم سنه دئسین آغا میرحسین آ. بیز کؤیشه نه کؤچمکده؛ بیزیم بو آلاش بیر داش اولدو دوشدو قویویا! سو اولدو باتدی یئره. یوخ اولدو کی یوخ اولدو. ایکی الیم اولدو بیر باشیم. آللاه گؤره سن بو ایتین باشینا نه گلدی؟ قاراچی لار توتوب آپاردی می؟! ایلان چالدی می؟! سیلدیریمدان دوشدو مو؟
بس من ایندی اونسوز باشیما هارانین داشینی سالیم؟! آلاش اولماسا سورونو نئجه قورویا بیللم؟! بو نه ایش ایدی گلدی منی تاپدی؟ بئله ده بیر ایش اولارمی؟!
گئجه _ گوندوز فیکریم قالمیشدی آلاشین یانیندا. بیلیردیم کی، بو ایشین ایچینده بیر ایش وار. آلاشین باشیندا بیر ایش اولماسایدی سورونون یانیندان قیراغا چکیلمزدی. داواری بیر گؤز قیرپیمی گؤزدن قویمازدی!
نه ایسه، دؤرد گوندوز دؤرد گئجه، داواری کؤیشنده اوتاراندان سونرا یئنه قایتاردیق داغا ساری.
آخشام چاغی ایدی کی، سورونو آستا _ آستا ائندیردیک کور چشمه نین یانینا. او سؤیودو گؤرورسن؟ نه گؤرسم یاخشیدی؟
گؤزون یامان گؤرمه سین، بیر قارالتی ساتاشدی گؤزومه، بیرده باخدیم گؤردوم آلاش اوزانیب قالیب سویودون دیبینده! دئدیم؛ ائویم ییخیلیب، ائله دوز بیلمیشدیم او حیوانی ایلان سانجیب. تله سیک قاچدیم باشی اوسته. اویان_بویانینا دیققتله گؤز گزدیردیم. یارادان_زاددان گؤرمه دیم.‌ حیوان ماغمین باخیشلا گؤزلرینی ائله کی آچا بیلدی. گؤزلرینده بیر سؤز وار ایدی. سانکی دئییردی: یاخشی واخت گلیب چاتدین داها منلیک ایش قالماییب. ایندی آرخایین اؤله بیللم! گؤردوم حیوانین راماغی قالماییب. هله _ هلدی جانی چیخسین. بیرده گؤردوم دئمه به چؤرک شالیمیز قالیب بوردا، بو یازیق حیوان دا اونو قوروماق اوچون یانیندان قیراغا چکیلمه ییب. حیوان آلاشیم آجیندان اؤله _ اؤله شالدان اولان چؤرک لره دیلینی ده وورماییب! بوغازیم بیچیلدی. منه بیر دلی آغلاماق گلدی. او حالدا، تله سیک قاچدیم قویونلارین بیرینین سودوندن بیر آز ساغیب گتیریب قاشیق_ قاشیق آلاشین بوغازینا تؤکدوم. گؤزلرینه بیر آز ایشیق گلدی. بیر آز چؤرک دوغراییب سودون ایچینده ایسلاتدیم. یاواش _ یاواش قویدوم آغزینا. زور _ زوراکی بیر _ ایکی تیکه اودا بیلدی. گؤوده سینی چوخ زورلا ترپتدی. اوره ییم بیر آز یئرینه گلدی. اوزونه باخارکن دئدیم: آی حیوان سن بو ایشی نییه گؤروردون آخی؟! چؤرک قاباغیندا قالا_ قالا آجیندان اؤله جه یدین؟!
آلاش سانکی دیل بیلیر؛ باخیشی ایله منه آنلاتدی کی، اؤلردیم آمما باغلی شالین ایچینده اولان چؤره یه دیلیمی وورمازدیم!
آلاش یاواش _ یاواش جانا گلیردی. منه دونیانی وئرسه یدیلر او قدر سئوینمزدیم. دریندن سئویندییمده غریب خیاللارا دالیردیم.
ایچیمدن مین _بیر جور فیکیر_خییال کئچیردی. آللاه بو حیوانلاری نه سایاق یارادیب گؤره سن؟ بیر حیواندا نه قدر دوشونجه اولار بیلرمیش؟ بیز آداملار... کاش ...
سیفی عمی نین گؤزلری یاشا دولوردو. کئچه جه یین کوچه لرینده سئیر ائدیردی. خیال قوشو اوچوب گئتمیشدی. هارالاردایدی بیر اؤزو بیلیردی. او آندا خیالیندان نه لر کئچیردی، بیلمیردیم، آنجاق امینم کی آلاشینی دا اورک دولو نیسکیل له خاطیرلاییردی.
منی ده اؤزویله چوخ اوزاق چاغلارا آپارمیشدی.
آخشام سویوغونو جانیمدا دریندن دویوردوم. یوخودان آییلان آدام کیمی یاواش _ یاواش اؤزومه گلیردیم.
سیفی عمی ده بیر آزدان اؤزونه گلیب، یولداشینا ایشاره ائله دی کی، دور سورونو ییغ بیر یئره بئواخت اولمامیش یولا دوشک.
من ده سورونون توز _ توپراغینا دوشمه ییم دئیه جلد آیاغا دوروب چوبانلارلا ساغ اوللاشدیم.
بیلمه دیم هاچان گدیکدن دره یه ائندیم، دره دن هاواخت دوزه چیخدیم.
گون چوخدان باتمیشدی. ائله کی، شافاق دا چکیلمیشدی.
آلا تورانلیق اولموشدو. داها قورد _قویون دان سئچیلمیردی.
کندین چیراغلاری اوزاقدان قورد گؤزو کیمی ایشیلداییردی.
بیلمه دیم او اوزون یولو نئجه گلمیشم!
قاپیدان ایچری گیرنده آنامی گؤزو یولدا گؤردوم. نییارانلیق اوزوندن یاغیردی، آمما اوزومه گلمه دی. یئتردی کی، باشی سویوق اوغلو هاردایدی سا، ساغ _ سلامت گلیب ائوه چاتیب...

حیات یولداشیم منه هویوقموش باخارکن؛ _ بو اوچونجو چایین دی کی ماسا اوسته بوزلاییب دئییردی.
من "حیوانلار حیکایه لری" کیتابیمدا، چوبان سیفی نین آلاشینین حیکایه سینی یازیردیم...
#میرحسین_دلداربناب
۱۳۹۹/۰۳/۰۳

  • میر حسین دلدار بناب