فلکین قانلی الیندن بیر آتیلمیش یئره اندی،
بیر فلاکت آنانین جان شیره‌سیندن سودون امدی،
بوللو نیسگیل شله‌سین چیگنینه آلدی.
تای توشوندان دالی قالدی،
ساری گول مثلی سارالدی،
گونو تک باغری قارالدی،
درد الیندن زارا گلدی،
گونو گوندن قارا گلدی.
خان چوبانسیز سئله تاپشیرسین اوزون،
یوردوموزا بیر سارا گلدی.
بیر وفاسیز یار الیندن یارا گلمز سانا گلدی.
بیر یازیق قیز، جان الیندن جانا گلمز جانا گلدی.
کئچه‌جکده “الموت” دامنه‌سیندن بورایا درمانا گلدی.
بیر آدامسیز “سورو” آدلی،
الی باغلی، دیلی باغلی!
“سورو” کیم‌دیر؟
سورو بیر گولدو جهنمده بیتیبدیر.
سورو بیر دامجی‌دی گؤزدن آخاراق اوزده ایتیبدیر.
سورو یول-یولچو سودور،
اَیری‌ده یوخ، دوزده ایتیبدیر.
سورو، بیر مرثیه‌دیر اوخشایاراق سؤزده ایتیبدیر.
او کؤنول‌لرده کی ایتمیش‌دی ازلدن،
اودو گؤزدن‌ده ایتیبدیر.
سورو بیر گؤزلری باغلی،
اوزو داغلی، سؤزو داغلی،
اولوب هاردان هارا باغلی!
بوشلاییب دوغما دیارین،
اوموب البته یاریندان.
ال اوزوب هر نه واریندان.
قورخماییب، شهریمیزین قیشدا آمانسیز بورانیندان،
نه قاریندان
گزیر آواره تاپا،
یاندیریجی دردینه چاره، تاپا بیلمیر.
چوخ سئویر عشقی باشیندان آتا،
آمما آتا بیلمیر.
آووا باخ، آووچی دالینجا قاچیر،
آمما چاتا بیلمیر.
ایش دؤنوب،
لیلی دوشوب چؤللره مجنون سوراغیندا.
شیرین الده تئشه،
داغ پارچالاییر فرهاد اوتورموش اوتاغیندا.
تشنه لب قونچه گؤر جان وئری دریا قیراغیندا.
گؤزده حسرت یئرینی خوشله‌ییب ابهام دوداغیندا.
وارلیغین سون اثری آز قالیر ایتسین یاناغیندا.
سانکی بیر کؤزدی بورونموش کوله وارلیق اوجاغیندا.
کؤزه‌ریر پیلته کیمین یاغ توکه‌نیب‌دیر چیراغیندا.
بوی آتیر رنج باغیندا،
قوجالیر گنج چاغیندا،
بیر آدامسیز،
سورو آدلی،
الی باغلی،
دیلی باغلی!
سورو جان! اومما فلکدن،
فلکین یوخدو وفاسی،
نه قده‌ر یوخدو وفاسی،
او قده‌ر چوخدو جفاسی،
کؤهنه رقاصه کیمین،
هر کسه بیر جوردی اداسی،
او آیاقدان دوشه‌نی،
ایستیر آیاقدان سالان اولسون.
او تالانمیش‌لاری ایستیر گونو-گوندن تالان اولسون.
او آتیلمیشلاری ایستیر هامیدان چوخ آتان اولسون.
او ساتیلمیشلاری ایستیر، قول ائدرکن ساتان اولسون.
نئیله‌مک قورقو بوجوردور،
فلکین نظمی ازلدن اولوب اضدادینه باغلی،
قاراسیز آغلار اولانماز،
دره‌سیز داغلار اولانماز،
اؤلوسوز ساغلار اولانماز.
گره‌ک هر بیر گؤزه‌له، بیر دانا چیرکین‌ده یارانسین،
بیری اَنسین یئره گؤیدن،
بیری عرشه اوجالانسین.
بیری چالسین ال-آیاق غم دنیزینده،
بیری ساحلده سئوینج ایله دایانسین.
بیری ذلت پالازین باشه چکیب یاتسادا آنجاق،
بیری‌نین بختی اویانسین.
بیری قویلانسادا نعمت‌لره یئرسیز،
بیری‌ده قانه بویانسین.
آی آدامسیز سورو آدلی،
ساچلاریندان دارا باغلی!
نئیله‌مک ایش بئله گلمیش.
چور گلنده گوله گلمیش.
فلکین اَیری کمانیندا اولان اوخ،
آتیلاندا دوزه دگمیش،
دیلسیزین باغرینی دَلمیش،
اَیری قالمیش،
دوزو اگمیش.
اونو خوشلار بو فلک،
ائل ساراسین سئللر آپارسین،
بولبول حسرت چکه‌رک،
گول ثمرین یئللر آپارسین.
قیسی چؤللرده قویوب،
لیلی‌نی محمللر آپارسین.
خسرووی شیرین ایلن ال-اله وئرسین،
فرهادین قامتین اگسین.
باخاراق چرخ زامان نئشه‌یه گلسین.
کئفه دولسون،
سورو‌لار سولسادا سولسون،
بیری باش یولسادا یولسون،
سیسقا بیر اولدوز اگر اولماسا اولدوزلار ایچینده،
بو سما ظولمته باتماز.
داش آتان، کول باشی قویموش،
داشینی اؤزگه‌یه آتماز.
سن یئتیش سون هدفه،
اوندا فلک مقصده چاتماز،
داها افسانه یاراتماز.
سورو، ای باشی بلالی،
زامانین قانلی غزالی!
سورو بیر قوش‌دی
خزان آیری سالیبدیر یوواسیندان،
ال اوزوبدور آتاسیندان،
جوجه‌دیر حیف اولا سود گؤرمه‌ییب اصلا آناسیندان.
او زلیخا کیمی یوسف اییین آلمیر لباسیندان.
بونا قانع‌دی تنفس ائله‌ییر، یار هاواسیندان.
درد وئره‌ن درده سالیب آمما خبر یوخ داواسیندان،
آغلاییب سیتقایاراق بهره آپارمیر دوعاسیندان.
او بیر آئینه‌دی رسّام چکیب اوستونه زنگار،
اوندا یوخ قدرت گفتار،
اوزو چرکین، دیلی بیمار،
گنج وقتینده دل‌آزار،
گؤره‌سن کیم‌دی خطاکار!
گؤره‌سن کیم‌دی خطاکار!
اردبیل 10/6/1365
عاصم اردبیلی
