جاوانلیق چاغلاریندا، هردن اؤز اؤزومه بیر سؤزلر قوشاردیم دئیردیم بس شعردیلر!
سونرالار او قدر بؤیوک شاعیرلردن شعر اوخودوم کی باشا دوشم، شعر شوخلوق بیر زاد اولا بیلمز!
بیر ایکی دفتر یازدیقلاریمدان یاندیردیم، نه یه کی، دئدیم: اؤزوموزو لاغچیلارین لاغینا نیشانه ائله مییک.
او گونلرده دوستلاریمیمن بیرییله شعرله شیردیک!
اوتوز ایل بوندان قاباق یازدیقیم شعره بنزر لردن بیرینی اوخودوم، دوستومون خوشونا گلدی. چوخ آلقیشلادی. منی چاشدیردی. دئدیم: بالام اولمایا منیم یازیلاریم ائله شعریمیش، بیلمزدن یاندیرمیشام!!!
چوخ باشینیزی آغریتماییم، ائله او سببه بیر ایکی دانا قوشدوغوم بایاتیلاردان دوستلاریلا پایلاشیرام تا منی باشا سالسینلار گؤروم منیم یازدیقلاریم شعریمیش یا یوخ؟
دئسز یوخ، بیر دفه لیک شعر دفترین بوکوب اؤپوپ قیراغا قویارام.
بودا من یازدیقیم بایاتیلاردان بیر نئچه سی؛
یاناغیندا لاله وار
ساچیندا شلاله وار
ایچمه میش کئفلنمیشم
گؤزونده پییاله وار.
------------
سونایام گؤلدن آیری
بولبولم گولدن آیری
دیلیمی باغلاییبلار
اوزانام ائلدن آیری.
----------
سو ایچدیم چاناقدان من
بال داددیم دوداقدان من
گول باشین تیکان آلمیش
باخیرام اوزاقدان من.
---------
دوداقدا سؤز یئری وار
کابابدا کؤز یئری وار
کیم سنه گیزلین باخیب؟
اوزونده گؤز یئری وار!
--------
کابابی کؤزدن آللام
سورمه نی گؤزدن آللام
قاشییلا گؤز ذکاتین
آی کیمی اوزدن آللام.
------
آلیشیب یانیب کؤزووه دؤننم
بولاق دوداغیندا سؤزووه دؤننم
سن منه گیزلینجه بیر کره باخسان
باشیوا دولانیب، گؤزووه دؤننم.
------
قاشلارین یایا بنزر
بنیزین آیا بنزر
بال سوزن دوداقلارین
چاغلایان چایا بنزر.
------
ایلدیریم شاخدی گئچدی
یئر گؤیو یاخدی گئچدی
عؤمرون شیرین گونلری
سئل کیمی آخدی گئچدی.
------
غزللرده قالسین دوستلارین نظرین آلاندان سونرایا...
هله ایش چوخدو!
