بایاتی دادلی اولور

باخیشین دادلی غزل

باشلانیر اوندان ازل

گولر گوللر بیلیرم

دوداغین قاچسا گؤزل.

دلدار بناب

بیر بایاتی

بیر بایاتی 

عزیزلریمه ایتحاف؛

داماریمدا قانیمسان

جان ائوینده جانیمسان

بیرگون ایمانه گلسم

دینیم سن ایمانیمسان.

دلداربناب

تلگرامدا ائلیمیز - دیلیمیز آدیندا کانالیمین لینکی؛

                                                                             eldilimiz@

بیر نئچه یئنی دئییلمیش بایاتی

بوتون ائلیمیزی - دیلیمیزی سئون یولداشلارا ایتحاف.

عزیزیم آرا بیرگون

گؤر منی آرابیرگون

نیسگیل باغریمی یارار

پوزولسا آرا بیرگون.

     *****

عزیزیم گؤزده یئرین

اورکده گؤزده یئرین

گؤز آلتی بیرده باخسان

سالارام گؤزده یئرین.

     *****

سرین بولاق گور بولاق

گئدمه دایان دور بولاق

سنده کیملر یووونوب؟

اولوبسان بولور بولاق.

     *****

آغ بولاق قارا بولاق

گئدیرسن هارا بولاق؟

یولون سال بیزیم ائله

سلام وئر یارا بولاق.

     *****

گونو گونه جالادیق 

غم اوسته غم قالادیق

دونیانین چاناغیندان

 یالنیز زهر یالادیق.

     *****

داغ آشدیم دوزه دوشدوم

اللی دن یوزه دوشدوم

بیر جوت شاماما گؤردوم

درمه دیم اوزه دوشدوم.

بیر نئچه بایاتی

ساقی گتیر چاناغین 

قوی دیده مه ایاغین

ال ساخلاما اماندیر

سؤندور غمین چیراغین.

     *****

ایچین ایچین آغلادیم

کؤنلومه کؤز باغلادیم

سئودالار اوجاغیندا

اوره گیمی داغلادیم.

     *****

گوزگویم سیندیریرلار

کیتابام یاندیریرلار

آتالار اوجاغییام

سو سپیب سؤندورورلر.

     *****

عزیزیم یاز گتیرسین

گولوشون یاز گتیرسین

یئل گلنده بویانا

بیر مکتوب یاز گتیرسین.

     *****

سحرلر خوروز بانلار 

کیم اونون دیلین آنلار؟

هارایلار عؤمور کئچدی

دورون غافیل اینسانلار.

خسته قاسیمدان بیر ساتیریک شعر

خسته قاسیم 1081 شمسی ایلینده تیکمه داش کندینده آنادان اولوب 76 ایل یاشایاندان سونرا دونیاسینی دگیشیبدیر.

خسته قاسیمین عاشیقلار ایچینده یوکسک مقامی وار. اؤزوندن سونراکی عاشیقلار درین تاثیر قویوب... (آرتیق معلوماتی محمد عبادی قاراخانلو یازان خسته قاسیم کیتابیندان آلماق اولار. بو کیتابی نشر اختر 1384 چاپ ائدیبدیر)

خسته قاسیمین ساتیریک روحیه سینی تانیماق اوچون اوندان بیر شعری سیزلر ایله پایلاشماق ایسته دیم.

واردیم باسمینج حامامینا

دللک گؤردوم زول چیخاردیر

ال آتدی قولاقلاریما

ائله بیلدیم کول چیخاردیر.

آیاقلارین قویور قوشا

اولگوجونو چکیر داشا

ضربی ائله گلیر باشا

تیکمه داشا یول چیخاردیر.

بیر فیطه سی واردی بئزدن

دوروب گلیر سحر تئزدن

یاری حاققین آلیب بیزدن

یئنه آجی دیل چیخاردیر.

اولگوجونو چاپیشدیریر

سویو تاسدان قاپیشدیریر

کسیر پامبیق یاپیشدیریر

دریسینی بول چیخاردیر.

بو اوستا نئجه اوستادی؟

همیشه گؤزو تاسدادی

خسته قاسیم جان اوسته دی

ائله بیلیر پول چیخاردیر.

                       

(قایناق:خسته قاسیم، محمد عبادی قاراخانلو، نشر اختر، تبریز، چاپ سوّم، 1389، ص148)