توپراقا نفس وئرن
نفسه قفس وئرن
سسیمیزه بیر سس وئر
قورو نئیه سس وئرن.
*****
بو گلن نئی سسی دی
صراحی مئی سسی دی
جان آیریلیب جاناندان
جانین گیلئی سسی دی.
*****
بو گلن تار سسی دی
یوخ سانکی یار سسی دی
هیجران چکن عاشیقین
آخ یار آخ یار سسی دی.
*****
بو گلن جان سسی دی
عهد و پیمان سسی دی
یئر اوزونده تک قالان
یازیق انسان سسی دی.
*****
بو گلن جان سسی دی
دورو ویجدان سسی دی
دونیانی جننت ائدن
اهل عرفان سسی دی.
*****
هله آردی وار
سؤز وار شعردی شعوردو
سؤز وار دویغودو شوردو
سؤز وار قارا، کاس، کیفیر
سؤز وار گونشدی نوردو
*****
سؤز وار گولر اوز کیمی
سؤز وار سرین، بوز کیمی
سؤز وار دوزسوز، شیت، یاوان
سؤز وار دادلی، دوز کیمی
*****
سؤز وار روحدو روان دی
سؤز وار دامادا قان دی
سؤز وار کؤنول دوستاغی
سؤز وار اورک آچاندی
*****
سؤز وار فرزانه ائیلر
سؤز وار دیوانه ائیلر
یوز قات تیکیلمیش ائوی
سؤز وار ویرانه ائیلر
*****
سؤز وار یازا برابر
سؤز وار نازا برابر
سؤز وار طبیلدی بوشدو
سؤز وار سازا برابر
*****
سؤز وار سازدی آوازدی
سؤز وار غمزه دی نازدی
سؤز وار بیری آرتیقدی
سؤز وار مین بیری آزدی
*****
درمانیمسان نه دردیم
نه اکمیشدیم نه دردیم؟!
گؤیول گؤیولو سئوسه
منیم اونا نه دردیم!
هله آردی وار...
