شعر یا شعره بنزرلر (یئددینجی حیصصه)
پنجشنبه, ۵ شهریور ۱۳۹۴، ۱۱:۴۹ ق.ظ
سؤز وار شعردی شعوردو
سؤز وار دویغودو شوردو
سؤز وار قارا، کاس، کیفیر
سؤز وار گونشدی نوردو
*****
سؤز وار گولر اوز کیمی
سؤز وار سرین، بوز کیمی
سؤز وار دوزسوز، شیت، یاوان
سؤز وار دادلی، دوز کیمی
*****
سؤز وار روحدو روان دی
سؤز وار دامادا قان دی
سؤز وار کؤنول دوستاغی
سؤز وار اورک آچاندی
*****
سؤز وار فرزانه ائیلر
سؤز وار دیوانه ائیلر
یوز قات تیکیلمیش ائوی
سؤز وار ویرانه ائیلر
*****
سؤز وار یازا برابر
سؤز وار نازا برابر
سؤز وار طبیلدی بوشدو
سؤز وار سازا برابر
*****
سؤز وار سازدی آوازدی
سؤز وار غمزه دی نازدی
سؤز وار بیری آرتیقدی
سؤز وار مین بیری آزدی
*****
درمانیمسان نه دردیم
نه اکمیشدیم نه دردیم؟!
گؤیول گؤیولو سئوسه
منیم اونا نه دردیم!
هله آردی وار...
سؤز وار اوره کده ایتر
عزیز دیلدار معلیم
اؤره گیندن گول بیتر
دیلدار معلیم بوندان قاباقکی شعریوی سیزدن ایجازه آلمامیش تلگرام گروپلاریندا یایدیم چوخ به یندیلر. آنجاق دئدیم ایجازه ز اولسون. بو شعریزیده چوخ سئودیم. بو شعری یایماغا ایجازه ایستیرم. یاشا