سؤز وار کؤنولو آلار
سؤز وار عقربدی دالار
دیلینی ساخلاماسان
ایلان تک خالقی چالار
*****
سؤز وار کؤنولو اوولار
سؤز وار شیطانی توولار
سؤز وار ساواش یاتیردار
سؤز وار قیلینجلار سوولار
*****
سؤز وار زهر کیمیدیر
سؤز وار شکر کیمیدیر
سؤز وار قارانلیق گئجه
سؤز وار سحر کیمیدیر
*****
سؤز وار قیل و قال اولار
سؤز وار خالیص حال اولار
سؤز وار بوبردن آجی
سؤز وار سوزمه بال اولار
*****
سؤز وار اینجی دن ظریف
سؤز وار شرف دن، شریف
سؤز وار اوردولار پوزار
سؤز وار قوشونا حریف
*****
سؤز وار گؤزلری آچار
سؤز وار نوردو، نور ساچار
سؤز وار اورک اووسونلار
سؤز وار اوندان قان قاچار
*****
سؤز وار قانماز قاندیرار
سؤز وار گؤیه قالدیرار
سؤز وار اوجاق سؤندورر
سؤز وار چیراق یاندیرار
*****
سؤز وار داغا میندیرر
سؤز وار داغدان اندیرر
سؤز وار شنلیک یارادار
سؤز وار اورک سیندیرار.
هله آردی وار...
