آرخاندا گزن ایزم
اوزونده قالان گؤزم
سئودالار اوجاغیندا
اوره گی یانمیش کؤزم.
*****
اوزوگونده قاش اولایدیم
کاش بیر اولان کاش اولایدیم
گؤز ببه یینده تیتره ین
بیرجه داملا یاش اولایدیم.
*****
سوراغلارام ایز به ایز
آغلارام دنیز دنیز
یازیم بایرامیم اولار
سنله گلسم اوز به اوز.
*****
دنیزده گمین اوللام
سازدا دیل غمین اوللام
کؤنلن کیم یارا وورسا
اؤزوم مرهمین اوللام.
*****
باغلاری بارسیز گؤردوم
هئیواسیز نارسیز گؤردوم
بیر اوزگور تاپانمادیم
مین دانا عارسیز گؤردوم...
هله آردی وار
گؤیدن اندی آی اوزه
گؤزو دیدی آی اوزه
اوتانیب اینجه لندی
چیخانمادی آی اوزه
*****
بو گلن تار سسی دی
یوخ سانکی یار سسی دی
قفسده قالان قوشون
آخ یار آخ یار سسی دی
*****
بو گلن جان سسی دی
غوربت حرمان سسی دی
یئر اوزونده تک قالان
یازیق انسان سسی دی
*****
بو گلن نئی سسی دی
صراحی مئی سسی دی
جان آیریلیب جاناندان
جانین گیلئی سسی دی
*****
گوز یاشین سیله سیله
اورکدن گوله گوله
سحر قوجاق آچیری
قیزیل گوللر بولبوله
*****
داماریمدا قانیم سن
جاندان عزیز جانیم سن
بیر گون ایمانه گلسم
دینیم سن ایمانیم سن
*****
دیل آچماسین گیلئی لر
گیلئی لر کیمه نئیلر
خوشلوق سرخوشلوق اولسون
سوزولسون جاما مئی لر
*****
ماوی گؤلده یار اوزنده
سو اوزنده نار اوزنده!
خییال قوشو اوچوب گئدر
یوخ اوره یین وار اوزنده
*****
هله لیک آردی وار...
